Vest-Telemarkrådet er eit regionalt samarbeidsorgan for kommunane Fyresdal, Kviteseid, Nissedal, Seljord, Tokke og Vinje. Rådet arbeider for at regionen skal vera attraktiv for busetnad, arbeid og opplevingar. Har du…
Tradisjonen tru vart desembermøtet i fylkestinget arrangert på Straand Hotel i Vrådal. Det nye fylkestinget for Vestfold og Telemark behandla fleire viktige saker, mellom anna budsjettet der omtrent 5 milliarder vart fordelt.
Ordførar Bjørn Nordskog ønska fylkestinget velkommen til Kviteseid, og Olav Veum frå Vest-Telemark Næringsforum orienterte om næringslivet i regionen.
I det vedtekne budsjettet ligg det inne fleire positive ting for Vest-Telemark.
Fleire arbeidsplassar i Vest-Telemark
Fylkestinget gav tydelege føringar om at fylket skal lokalisere fleire arbeidsplassar til øvre Telemark. Dette arbeidet vil rådet og kommunane i Vest-Telemark følge aktivt opp for å styrke fagmiljø vi allereie har i regionen.
Bygningsvernsenter
Vest-Telemark har ein rik bygningsarv, med mange verna og unike bygningar som må takast vare på. Difor har Vest-Telemarkrådet og Vest-Telemark Museum denne hausten jobba med å få etablert eit bygningsvernsenter. Rådet og kommunane Tokke og Vinje har sett av midlar til eit prosjekt, og det er sendt ein søknad om bidrag frå fylkeskommunen. Fylkestinget har i budsjettet bedd om at det blir jobba fram ei sak om dette tidleg i 2020.
Klimakutt og grøn omstilling
Det nye fylket tek ei leiarrolle for å redusere klimagassutsleppa og få til grøn omstilling. Fylkeskommunen skal bygge i tre, utsleppa på transport skal ned og næringslivet skal omstille seg og skape grøne arbeidsplassar. Dette er gode signal no som Vest-Telemark skal igong med ein regional klimaplan, der samarbeidet med fylkeskommunen vil vere heilt sentralt.