Vest-Telemarktinget staka ut kursen for 2020-21

Avtroppande regionordførar gir klubba til ny regionordførar Jarand Felland

Jon Rikard Kleven blir takka av som regionordførar

Regionordføraren takkar regionrådsleiaren for innsatsen i året som gjekk

Torfinn Opheim frå LVK legg ut om rapporten frå kraftskatteutvalet

Regionrådsleiar Anne Aasmundtveit la fram arbeidsprogram og budsjett

12. desember 2019
Rådsmøte

Det nye Vest-Telemarktinget var samla i Treungen til sitt fyrste møte 10. desember 2019. Møtet starta med ein presentasjon av alle tingmedlemmar og administrasjonen i rådet.

Det var fleire viktige saker for regionen som skulle handsamast i møtet.

Ny regionordførar

Jarand Felland, ordførar i Tokke kommune, vart valt til ny regionordførar for perioden 2020-21. Han overrekte blomar og takk til Jon Rikard Kleven for vel utført arbeid som regionordførar i 2018–19. Som regionvaraordførar valte Vest-Telemarktinget ordførar i Nissedal kommune Halvor Homme.

Arbeidsprogram og budsjett

Rådet sitt arbeidsprogram for perioden 2020-21 vart handsama i rådet 12. november 2019. Programmet vart samrøystes vedteke i tinget. Budsjettet for 2020 vart vedteke med ei endring der tinget vedtok å støtte ei 2-årig satsing på bygningsvern ved Vest-Telemark Museum med kr 200 000.

Domstolstruktur

Tingmøtet drøfta framlegg til uttale til domstolstruktur. Vest-Telemarktinget meiner det i framtida må vera ein domstol i Vest-Telemark lokalisert i Kviteseid. Uttala blir sendt til justisministeren og Telemarksbenken på Stortinget.

Kraftskatt

Torfinn Opheim, styreleiar i Landssamanslutninga av vasskraftkommunar (LVK), presenterte LVK sine synspunkt på rapporten frå kraftskatteutvalet (NOU 2019:16) og konsekvensane som foreslåtte endringar i kraftinntektene vil ha for mellom anna kommunane i Vest-Telemark.

Vest-Telemarktinget meiner at anbefalingane i NOU 2019:16 er eit alvorleg brot på den samfunnskontrakten som ligg til grunn for utbygginga av vasskraftressursar i Noreg, og at regjeringa difor må leggje rapporten til side.

Reiseliv

Lill Susan Vale i Reiselivsutvikling AS innleia til debatt om moglege val av strategi i reiselivet i Vest-Telemark. Det vart signalisert til administrasjonen i rådet at det skal bli jobba vidare med ei eventuell felles forpliktande strategisatsing. Ein viktig føresetnad er at dette arbeidet må skje i tett samarbeid med reiselivsnæringa i regionen. Det skal bli lagt fram ei sak i rådet om oppfølging av arbeidet.

Trafikkstasjonar

Jarand Felland presenterte uttale til Samferdselsdepartementet til ny struktur for statens trafikkstasjonar. Vest-Telemarktinget meiner mellom anna at oppkøyring for førarkort klasse B på Dalen må vidareførast.